سێ برا

سێ برا لە ماڵێکدا دەژین. بچووک و ناوەنجی لە نهۆمی سەرەوە، برا گەورەش لە خوارەوە.

برا بچووکەکە کە کاتی خۆی هەرزەکار بوو؛ نەیدەویست هەموو چرکەیەک لە کاتی بەجێهێنانی ئەو فەرمانەی سروشتدا بگیرێ کە ئەویش فەرمانی بانگکردن و کۆکردنەوە و جینۆسایدکردن و سەرنگومکردنی ئاپۆرای سپێرمە؛ بۆیە دەیویست نهۆمی سەرەوە بۆ خۆی وەربگرێ و کەمێک بە ئازادی ئەم کوشتوبڕە بکا. هەر لەبەرئەمەشە کە لێرە بەدواوە بەڕێزیان بە حەزرەتی سپێرمکوژ ناوزەددەکەین. پاش هەوڵ و ماندووبوون و تەقەلا و کۆشش و خەباتی زۆر؛ ئێستا لەگەڵ ناوەنجییەکەدا لە سەرەوەن.

برا ناوەنجییەکە، بە ڕای من نا، بەڵکو بە ڕای زۆربەی شارەزایان و قاڵان و زانایانی بواری خوێڕێتی؛ خوێڕییەکی باڵادەستە. بۆیە لێرە بەدواوە بە بەڕێز حەزرەتی خوێڕی ناوزەدیدەکەین. ئەم حەزرەتی خوێڕییە هەموو ڕۆژێ کەلوپەلێکی نهۆمی سەرەوەی ماڵەکەی خۆیان دەبا و لە مۆڵ و بازاڕ دوکان و عەرەبانە و سەر شۆستە و سەکۆکاندا دەیفرۆشێتەوە. بە کاکیشی دەڵێ تۆ دەبێ تێچووی هەموومان و نهۆمی سەرەوەش دابینبکەی… پارەش بە خۆم بدەی.

کاکیشی دەڵێ:

  • تۆ سەرەوەت فەرهوود کردووە و هەمیشەش داوای پارە دەکەی!

بەڵام هەر کە برا گەورەکە قسە دەکا؛ حەزرەتی خوێڕی یەکسەر هەڕەشەی جیاکردنەوەی قادرمە دەکا. حەزرەتی سپێرمکوژیشی بەوە فریواندووە کە دەیگرێتە ئەستۆی خۆی و چیتر دەتوانێ بە ئازادی سپێرم بکوژێ و ئەگەر سپێرمێکیشی بە شایستەی ژیان دانا؛ ئەوا بەخێویبکا و بیخاتە حوجرەوە، بەڵکو شتێکی لێدەربچێ! تەنانەت بە هاوکاریی هاوڕێکانی خۆی کە پەیوەندییەکی زۆریان لەگەڵ سەندیکای حوجرەمەنداندا هەیە؛ ئەوا حوجرەکەی بەسەر قادرمە جیاکراوەکەدا بۆ بهێننە سەرەوە و هەر لەوێ دەستبکەن بە خوێندنی وانەکانیان.

وەرە هەردووکمان ناڵەمان یەکخەین،

بەڵکو بەو عیشقە نیشتمان سەرخەین!

بۆیە پێشنیازی ئەوەیکرد کە هەردووکیان دەتوانن پێکەوە تۆزێ سەربەخۆ بن و لە زەبروزەنگی براگەورەکەیان بەدووربن، بەڵام بە مەرجێ: حەزرەتی سپێرمکوژ دەنگ بە جیاکردنەوەی قادرمە بدا.

بۆ مەبەستی تاووتوێکردنی ئەم پێشنیازەی حەزرەتی خوێڕی، حەزرەتی سپێرمکوژ چووە ماڵی ڕیشسپیی گەڕەکەکەیان. پیاوێکی حەفتاساڵەی ڕیش ڕەشکراوە بەخێرهاتنی کرد و فەرمووی دانیشتنی لێکرد. حەزرەتی سپێرمکوژ وتی:

  • هاتوومەتە خزمەت بەڕێز ڕیشسپی، ئەگەر ئەرک نەبێ بۆم بانگبکەی!

پیاوەکەش وتی:

  • حەفتەی ڕابردوو ئارەزووی شۆڕەژنێکی بێوەژن دایگرتووم، بۆیە ڕیشەکەم ڕەشکردووەتەوە. خۆم ڕیشسپییەکەم. مەترسە و بڵێ. ئەگەر بەقسەشم دەکەی؛ واز لەم خووە ناشرینەت بهێنە کە گا بە گوندا دەناسیتەوە!

حەزرەتی سپێرمکوژ گەلێ شەرمەزار بوو و خێرا هەستا دەستی مام ڕیشسپیی بۆیاخکراوەی ماچکرد و داوای لێخۆشبوونی کرد. ئەویش دەستی هێنا بەسەریدا و دۆخەکە بۆ باری ئاسایی گەڕایەوە. سپێرمکوژ کەوتە گێڕانەوەی بەسەرهات و پێشنیازی حەزرەتی خوێڕی. مام ڕیشسپیی بۆیاخرکراوە لە وەڵامدا پێیفەرموو:

  • کوڕی خۆم، ئەو بە بەرچاوی براگەورەکەت و هەموو گەڕەکەوە هەموو شتەکانی ماڵەکەتانی دزیوە و فلسێکیشی بەتۆ نادا. لەگەڵ برا گەورەکەشتدا نێوانتانی تێکداوە. ئێستا چاوەڕێدەکەی قادرمە جیابکاتەوە سوودی بۆ تۆ هەبێ؟ سبەینێ باجی جیاکردنەوەی قادرمەکەش بە تۆ دەدا و پارەی قادرمەکەش، کە بێگومانم پێی نییە، شەست قات زیاتر لە تۆ دەسەنێتەوە. ئینجا بۆ چەوساندنەوەت تەواو شووڵی لێهەڵدەکێشێ و هەموو چرکەیەک مننەتی ئەوەت بەسەردا دەکا کە ئەگەر ئەو نەبووایە یەک گیانبەبەرداکراو نەیدەتوانی قادرمەیەکی حیز جیابکاتەوە! بۆیە هەستە بچۆرەوە ماڵەوە و سپێرمێ بکوژە و نانێ بۆ براگەورەکەت بکە بە خێر!

منیش هاتمەوە و هەر نەشمزانی ئایا قادرمەکە جیاکرایەوە یان نا. کە زانیم؛ بێگومان پێتاندەڵێم.