بڵاوکردنەوەی ڤیدیۆی ئاهەنگ نایاساییە

ئەگەر داوای وێنەیەک لە ئافرەتێک بکەیت، تەواو کۆتایی بە دنیا دێت. چۆن شتی وا دەبێ؟ حەرامە! جوان نییە! خەڵک چیمان پێدەڵێ؟ بڵاودەبێتەوە! باوکم دەمکوژێ! ئامۆزاکانم دێنە سەرم. بۆ تۆ من بە کێ تێگەیشتووی؟ تۆ دەزانی من کچی کێم؟

تا ڕادەیەکی زۆر ڕاست دەکەن. بەڵام…

لە ئاهەنگێکی هاوسەرگیریدا پڕهۆڵێک ئافرەت بە تەنوورەی کورت و عەزیی بێقۆڵ و سنگڕووت و دوامۆدەوە لەسەر ڕیتمی گرمەگرمێکی مێشکتەقێندا چوار سەعات هەڵدەبەزنەوە. دوو سێ کوڕی بێگانەش بە کامێرای ڤیدیۆ وێنەیان دەگرن. ئەم ڤیدیۆیە سبەینێ دەبێت بە سیدییەک و ماڵەوماڵ دەگێڕرێ و دوکانی ڤیدیۆکەش بە سیدی دەیفرۆشێتەوە. بۆ نموونە لە سەهۆڵەکە لەسەر عەرەبانەی سیدی بەبەردەمی ئەم هەموو خەڵکەی ئەوێدا نمایشدەکرێ. خەڵکان دەوەستن و بەدەم گوڵەبەڕۆژە خواردنەوە تەماشای ئەم هەموو کچ و ژنانە دەکەن.

کەسێک جگە لە من نییە بڵێ ئەم دیاردەیە قێزەونە و نایاساییە و نابێ ڤیدیۆی تایبەتی خەڵک بفرۆشرێتەوە و لەبەرچاوی خەڵکانی تردا نمایشبکرێ. بۆچی لای خەڵک داواکردنی وێنەیەک حەرامە، کەچی بڵاوکردنەوەی حەڵاڵە؟

خودی خۆم، خۆم زۆر بەدوور دەگرم لە شوێنی قەرەباڵغ و داخراو و پڕ لە دەنگی بەرز. کە بۆ نەگبەتی پرسەخانە و هۆڵەکانی ئاهەنگ هەردووکیان وان. هەموو شوێنێکی هاوشێوە کە دەچم تا ماوەیەکی زۆر دوور و درێژ لەرەلەری دەنگی بڵندگۆ زیادکراوەکان لە مێشکمدا دەزرنگێتەوە و دەگرمێتەوە. بە شێوەیەک کە تەواو ماندووم دەکات و پێویستم بە پشوویەکی زۆر درێژی بێدەنگی دەبێت تا دێمەوە دۆخی هێوریی. ئەڵبەت بە هیچ شێوەیەک دژی ئەو بۆنانە نیم. بەڵکو پێموایە کە لە جێبەجێکردنی نەریتەکەدا چەند هەڵەیەک هەن کە دەبێ دەستنیشان بکرێن و چاکبکرێن. بە هیچ شێوەیەک دژی تەڕپۆشی و جوانپۆشیش نیم. بگرە پێمخۆشە هەموو کەسێک تەڕپۆش بێت. بە پێچەوانەی ئیسلامییەکانەوە هیچ سنوورێکیشم نییە بۆ چۆنێتیی تەڕپۆشی.

چەند برادەرێکم هەن پێش ئەوەی بچنە ئاهەنگی هاوسەرگیرییەوە چارەکێک ویسکی دەخۆنەوە. لێمپرسیون بۆچی وا دەکەن. وەڵامیان داومەتەوە بەوەی کە

  • بۆئەوەی شتمان پێ عەیب نەبێ!

منیش پێیان دەڵێم:

  • جا ئەگەر بەو پێوانەیەی ئێوە بێ کە پیاوەکان لە بەرکوڵدا چارەکێک دەخۆنەوە، ئەی ژنەکان؟ کەواتە یان ئەوانیش دەخۆنەوە، یان هەر لە لەدایکبوونەوە چارەکێک ویسکییان تێدایە!

ئەوەی کە سەیرترە ئەوەیە؛ هەر زۆرێک لەو ئافرەتە بەڕێزانە لە ژیانی ڕۆژانەیاندا حیجابپۆشن. بەڵام کە دواندوومن؛ دەڵێن

  • نا، ئەو ڕۆژە بۆنەیە!

Leave a Reply

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.