چۆن تەماتە دەخورێ؟

لە کەبابخانەکان تەماتەیەکت بۆ دەهێنن، بەقەد دوو سندی دەبێ. تەنها دووکەرتیان کردووە. قەتیش چەقۆیەکت بۆ ناهێنن تەماتەکەی پێ قاشبکەیت. وەکو نەریتێکی باویش؛ هەموو کەبابخانەکان و تەنانەت عەرەبانەی سەر جادەکانیش کوێرانە هەر وا دەکەن.

باشە کەس تا ئێستا نەیپرسیوە؛ “ئەرێ تەماتە چۆن دەخورێ؟”. ئایا بە قاڵب دەخورێ؟ بە نیوقاڵب؟ ئایا تەماتەی سەر قاپەکە دەبەیت بۆ دەمت، یان دەمت دەبەی بۆ تەماتەی سەر قاپەکە؟

هەرچۆنێک لێکیدەدەیتەوە ئەو کەرتە بۆمبە بخەیتە دەمتەوە بیست خولەک جوینی دەوێ، ئەگەر بیشیخەیتە ناو پارووەکەتەوە؛ ئەوا لە کاتی قەپلێدانەکەدا لەژێرەوە یان دادەچۆڕێت، یان فیق تەماتەکە خۆی دەخزێتە سەر پانتۆڵەکەت و تاهەتایە لەکەکەی لێنابێتەوە.

تەنانەت لەو چێشتخانانەشدا کە شێفەکانیان یان تورکن یان نیمچەتورک هەر هەمان تاس و حەمامە. بەڵام تەنها جیاوازی ئەوەیە لەوێ تا ڕادەیەک دەوێری داوای چەقۆ بکەی، یان خۆی لەسەر مێزەکە دانراوە. لە سایەی پەتای دەبەنگییەوە کە زۆربەی خەڵکان سەربەرزانە هەرچی خووی خراپ هەیە بە ناوی خاکێتی و سادەییەوە پەیڕەوی دەکەن. خوانەخواستە ئەگەر لە چێشتخانەیەکی میللیدا داوای چەقۆ یان چەتاڵ بکەیت کە هێمای جیهانیی چێشتخانەیە؛ ئەوا پێتڕادەبێرن و لەوانەشە تووشی شەڕ ببیت. شاگردەکە دێت و دەڵێ:

  • چەقۆت بۆچییە؟ شەڕ دەکەی؟
  • نا، ئەو تەماتەیە قاشدەکەم.
  • کوڕە هەر وا بکە دەخورێ، ئەوەندە ناسک مەبە! دەترسم تۆ لەوانە بی کە بە چەتاڵیش نان دەخۆیت و بە باوکیشت دەڵێی پاپی؟! کوڕە بابە تۆزێ خاکی بە و وەکو خەڵک بژی!

ئەگەر داوای چەتاڵیش بکەی دەڵێن:

  • چییە مامە؟! چەتاڵت بۆچییە؟ کوڕی دکتۆرە ناسکەی؟ خولە ئا بڕۆ چەتاڵێکی بۆ بکڕە، ئەم برادەرەمان کوڕی عەقارییە و بە باوکی دەڵێ پاپی!

خولە دێت و دەڵێ:

  • چەتاڵت بۆچییە؟ هەر وا بکە دەخورێ. قەیچێکە با دەستت پیس بێ! شت بە پیسی خۆشە!

من جگە لەوەی لە پەتای دەبەنگی خەڵکی گشتی نیگەرانم، ئێستا پرسیارە سەرەکییەکەم کە تا ئێستا وەڵام نەدراوەتەوە ئەوەیە:

چۆن تەماتە دەخورێ؟

Leave a Reply

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.